2024-mi 1. juulimi atuisunut akit

2024-mi juulip aallaqqaataani atuisunut akit naleqqersuutaat tamakkiisoq ukiup siuliani ullormi pineqartumut naleqqiullugu 2,8 pct.-imik qaffariarpoq. Nioqqutissat immikkoortuini tamani qaffariaat atuuppoq, taamaattoq inuussutissanut ineqarnermullu tunngasut naleqqersuutip qaffariaataannut sunniutaat annertuneruvoq. Inuussutissanut akit 2,7 pct.-inik qaffariaateqartut ineqarnermut akit 4,2 pc.-inik qaffariaateqarput.

 

Ineqarnermut akinut qaffariaammi pingaartumik kiassarnermut aningaasartuutit qaffasissuunerannik tunngaveqarpoq, akinullu naleqqersuummut tamakkiisumut tamanna sunniuteqangaatsiarpoq. Taamatuttaaq ikummatissat akiisa qaffariarnerat ineqarnermut aningaasartuutinut kiisalu assartuinermi aningaasartuutinut sunneeqataapput. Ikummatissat akiisa qaffasinneruneri ineqarnermi kiassarnerup akisunerulerneranik kinguneqarpoq taamatullu assartuinermi aningaasartuutinut aamma annertusaaqataalluni.

 

Inuussutissanut akini qaffariaat pingaartumik sodavandit, naatsiiat, sukkulaatit nerisassanullu akoralugit nerisakkat (ass. Ketchupit) akiisa qaffasinnerulernerannik peqquteqarpoq.

 

Atuisunut akit naleqqersuutaat atuisut tamakkiisumik atuinerisa agguaqatigiissinnerannik uuttuuteqarnera eqqumaffigissallugu pingaartuuvoq. Tabel 1-imi uuttuutit takukkit. Nioqqutissaqarfinni ataasiakkaani akit tamakkerlutik allannguutaat akit naleqqersuutaannut tamakkiisumut annertunerusumik sunniuteqarsinnaanngillat, soorlu atuisut ataasiakkaat aamma akit allanngornerat allatut misigisinnaagaat, atuisut namminneq qanoq atuisarnerat apeqqutaalluni.

 

Taamatuttaaq eqqumaffigineqassaaq 1.januaarimiit 1.juulimut akit qanoq inissisimanerat naleqqersuummi takutinneqarmat, taamatullu piffissap pineqartup iluani akit qanoq allanngortigisimanerannut takussutissaammat.

 

Qaammatit aqqaneq-marluk ingerlanerini qaffariaatit pct.-inngorneri titartakkami siullermi takutinneqarput.

 

Titartagaq 1. Atuisunut akit, qaammatit aqqaneq-marluk ingerlanerini qaffariaatit pct.-inngorlugit, 2020-mi juulimiit 2024-mi juulimut

Najoqqutaq: https://bank.stat.gl/PRNPRISV

 

Atuisunut akit ukiup affaani ineriartornerat

2024-mi januaarimiit 2024-mi juulimut atuisunut akit 2,2 pct.-inik qaffapput. Ukiup affaanut qaffariaammi ikummatissat akiinik qaffaanerit, ineqarnermi kiassarnermut assartuinermilu aamma aningaasartuutinut sunniuteqagaatsiartoq, peqqutaanerpaavoq. Akillu qaffasissusaannut tamakkiisumut pineqartut annertuumik sunniuteqarput. Atuisunut akini ukiup affaanut allannguutit 2020-mi juulimiit 2024-mi juulimut titartakkap aappaanmi takutinneqarput.

 

Titartagaq 2. Atuisunut akit, ukiup affaanut allannguutit pct.-inngorlugit, 2020-mi juulimiit 2024-mi juulimut

Najoqqutaq: https://bank.stat.gl/PRNPRISV

 

Nioqqutissaqarfiit ataasiakkaat sunniutaat

Nioqqutissanut kiffartuussinernullu atuisunut akit ineriartornerat nioqqutissaqarfiit taakku ataanniittuut ineriartuutaannit tunngaveqarpoq.

 

Atuisunut akini naleqqersuummi Ineqarnermut atortut nioqqutissat appariaareqarnerpaasimapput, Ineqarnermullu tunngasut nioqqutissat qaffariaareqarnerpaasimallutik. Ineqarnermut aningaasartuutini qaffariaat kiassanermut aningaasartuutit annertunerulernerannik ikummatissalu akisunerulernerannik, ineqarnermi aningaasartuutinut sunniuteqagaatsiartunik, peqquteqarpoq.

 

Titartagaq 3. 2023-mi juulimiit 2024-mi juulimut nioqqutissat immikkoortitikkat ukiumut allannguutaat pct.-inngorlugit

Najoqqutaq: https://bank.stat.gl/PRDPRISV

Malugiuk: Nioqqutissat assigiinngitsut atuisunut akinut naleqqersuummut sunniutaat takuneqarsinnaavoq. Akit nikissimanerat aamma qanoq oqimaalutarneqarsimanersut tassani apeqqutaavoq.